Turmush — «Түндүкэлектр» ачык акционердик коомунун улук инспектору Адилет Касеев Сырт өрөөнүндө топоздорун бактырып, кошумча каражат табат. Аны менен аймактык кабарчы маек курду.
«Мен 1985-жылы Ысык-Көл облусунун Тоң районуна караштуу Бөкөнбаев айылында төрөлүп-өскөм. И.Раззаков атындагы Кыргыз мамлекеттик техникалык университетинин энергетика факультетин аяктагам. Учурда «Түндүкэлектр» ачык акционердик коомунун улук инспектору болуп иштейм.
10 жыл мурун топоздун этин тамшанып жеп калдык. Дасторкон үстүндө отурган раматылык атам Жапаркул Касеев: "Эти абдан жакшы экен, топоз багып көрөлү" деген сунушун киргизди. Алгач топоздун 10 мамалагын сатып алып, иш баштадык. Ошентип жылына этке сатабыз, өзүбүз да эки топозду кышкы согумга союп алабыз. Топоздун эти абдан таза жана даамдуу болот. Анткени алар тоолордун башында жапайы жана витаминге бай чөптөр менен азыктанышат.
Мындан 2-3 жыл мурун топоз багуу жеңилирээк эле. Себеби топоз аз болуп, Сырт өрөөнүнө оңой барып, түгөлдөп карап алчубуз. Акыркы жылдары топоз баккандар көбөйүп, алар менен аралашып кетип, бир топ кыйынчылыктарды жаратууда. Топоз башка мал-жандыктардан айырмаланып колдон жем-чөп жебейт. Жайы-кышы дебей, өздөрүнүн жанын багышат», - деди ал.
Анын айтымында, топоздун мамалактарын кеч күздө бөлүп алышат.
«Сатчуларын сатабыз, тукумга алып калчуларды короодо жем-чөбүн берип, апрель айына чейин басып, кайра чоң үйүргө кошобуз. Мамалактарды бөлүп алуудагы максатыбыз — биринчиден, энесин байытуу (эмчектен чыгаруу), экинчиден кышында карышкырдын кол салуусунан аман алып калуу.
Азыркы тапта топоздун санын азайтып сатып жатабыз. Анткени раматылык атам топоздорду толуктап, карап турчу. Учурда жоопкерчилик мага түшкөн. Бирок менин жумушум Бишкек шаарында болгондуктан убакыт тар болуп, жетишпей жатабыз. Учурда 32 баш топозум бар. Мамалактары 25-30 миң сом, тайлары 40 миң сом, инек кунандары 50 миң сом, чоң топоздор 60-75 миң сомго чейин бааланууда», - деди ал.
Каарманыбыз үй-бүлөсү тууралуу кыскача кеп кылды.
«Үй-бүлөм тууралуу айта кетсем, келинчегим Айзат Бишкек шаарында акушер-гинеколог болуп эмгектенет. Жогорку категориядагы дарыгер. Мындан сырткары Эл аралык медициналык университетинде чет өлкөдөн келген студенттерге медицина боюнча англис тилинде сабак берет. Экөөбүз 2 кыз жана 1 уулду тарбиялап-өстүрүүдөбүз. Ысымдары — Наима, Эльхан жана Айыма. Келечекте медициналык борбор ачууну көздөп жатабыз», - деди ал.